هرعت بصحبة بعض الجيران والنسوة استجابةً لاتصال هاتفي من حجية نشمية تُخبرني فيه أن أبنها الوحيد صكَبان أبو الغاز ضارب بعقله فيوز وجامع الناس بالشارع ويخطب بيهم..
* ها صكَبان شنهي هاي الوادم الجامعهه من الصباحيات خو ماكو شي؟
– ماكو شي سويمر، بس البرلمان راح تنتهي دورته التشريعية وما شفنه منه شي بيه خبزه غير بس قانون منع التدخين بالأماكن العامة، وحتى ما طبقوه، فأريد آخذ هاي الوادم ونروح نلحكَ نودع ألأعضاء بطريقتي الخاصة أخاف بعد ما نشوفهم.
* إي عادي إحنه بلد بيه حرية وديمقراطية وانت شاب ومِن حقك، بس تعال فهمني شنو هاي طريقتك الخاصة؟
– سويمر حسبالك بس انت لازم ورقة وقلم وتتفلسف براسي، آني هَم سويت مراسيم ومناسك خاصة لأداء زيارة البرلمان، تعال أوكَف بصف الوادم راح أصعد على صبة الكونكريت وشوفهم اشلون مندمجين وياي ويكتبون كلامي حتى بعدين مِن نوصل للمنطقة الخضراء يطبقوه بحذافيره:
\”أخواني.. أخواتي.. أبناء منطقتي العزيزة، بسبب فشل مجلس النواب في تحقيق أبسط أحلام وأهداف أبناء الخايبة والمكَاريد فقد رأيت أنا صكَبان أبو الغاز ابن حجي مزيعل \”أدام الله ظلي الوارف\” بأن المسؤولية الشرعية والوطنية تتطلب مِنّا أداء زيارة لمقر هذا البرلمان لإلقاء النظرة الأخيرة على نوابه قبل وداعهم غير مأسوفٍ عليهم ولكن وفقَ مراسيم وآداب خاصة لهذه الزيارة.
فإذا توكلت وأتيت إلى مقر البرلمان أخي الزائر فعليك بالبداية أن تغتسل قبل دخولك إليه مرة، وبعد خروجك منه مرة ثانية، ثُم تستقبل المبنى من الخارج وبيدك العَلم العراقي وتقول:
السلام على من مَر من هنا وخَمَط من هناك، وحُوسم وصَلى ولطَم هنا ورقص وسَكر وَعَربد هُناك، وأصبح نائباً هنا من بعد ما كان متسولا هناك، وصوّر نفسه مع الفقراء هنا ومع الصبايا هناك، ولَبِسَ عِمامة هُنا وقميصا وبنطرونا هناك.
ثم تفتح باب البرلمان وتدخل برجلِك اليمنى وتضع العَلم جانباً وتمسك محفظتك ومستمسكاتك الشخصية وتضعهما تحت إبطك وتستقبل النواب فتقول:
السلامُ على نواب السرقة والضلالة، السلام على ناكثي العهود وعنوان النذالة، السلام على من ينتقد البعث ليلا ونهارا وهو أكثر منه سفالة، السلام على نواب الشيطان في أرض الأنبياء والرِسالة.
السلام على غلطة العمر، السلام على معنى العهر، السلام على أرذل الخَلق من البشر، السلام على مَنْ نهى عن المعروف وأمر بالمنكر، السلام على المتسترين بالدِين وبخدمة شعائر الحُسين وبالطمغة في الجبين والتختم باليسار واليمين، السلام على من كَرّهَ الناس بالدِين.
ثم ترفع رأسك إلى السماء وتتشاهد وتقول:
اللهم أشهدُ لكَ أنهم سرقوا المال، ويتموا العِيال، وصَرَخَت من فسادِهم الجبال، وحطموا بداخلنا الآمال… وأشهدُ أنهم شمتوا فينا البعثيين، وجعلوا مقالاتنا تنشرها مواقع الإرهابيين.
* هاي شنو صكَبان انت تحجي صدكَ لو تتشاقه، يمعود هاي الناس أغلبها ما تكتب كلامك حتى تنفذه بيوم زيارتك الموعودة وإنما حتى يتسابقون منو أول واحد بيهم يسجل دليل ضدك وياخذه للشرطة ويحصل بيك مكافأة..
على العموم تروحون وترجعون بالسلامة وزيارة مقبولة مقدماً.. ومن ترجع لبيتكم عود خابرني.
* كاتب عراقي
