خلال لقائه في “برنامج واحد من الناس” الذي يقدّمه الإعلامي عمرو الليثي على قناة “الحياة”، كشف الفنان أحمد عزمي سبب إدمانه الكحول، كما عبّر عن حزنه واستيائه الشديد بسبب وفاة شقيقه.
وقال عزمي “مريت بمرحلة صعبة وقاسية في حياتي؛ وهي مرحلة الإدمان، وبدأت إدمان الكحول حتى أهرب من واقع أنا عايشه بعد مقتل حمدي أخويا، وكان جوايا غضب شديد، واشتريت شقة في شرم الشيخ واتعرفت على ناس أخدتني إلى طريق الإدمان”.
وأضاف “شقيقي تعرض لحادث سرقة وحاول الدفاع عن نفسه وماله، ولكنه قتل مطعوناً بـ13 طعنة، كنت بصور فيلم “الشوق” مع خالد الحجر في إسكندرية وكنت عمري ما بشرب أثناء التصوير، وشربت وأنا بصوّر وفقدت أعصابي، أنا والدي من عمال المهنة، وكنت دايماً بحافظ على صورته في الوسط الفني”.
وعن أقرب الأصدقاء إليه، قال أحمد عزمي “باسم سمرة من أقرب الناس ليَّ، وشك في وقت إني مدمن كوكايين وجالي هو وشقيقه البيت وخطفوني، وحبسني في البيت عنده أربعة أيام، علشان يتأكد إني مش مدمن كوكايين، وقولتله أنا مدمن كحول فقط، وأنا كنت محتاج صدمة علشان أرجع عن الطريق اللي أنا ماشي فيه، وكان الحبس هو البداية إني أفوق تاني، وأنا كنت مسميها قرصة ودن”.
وأضاف “زوجتي طلبت الخلع بعد حبسي، ومضيت على خطاب المحكمة وأنا بضحك، وأنا كنت خارج عن السيطرة، وهي كانت خايفة على آدم ابني مني”.
وأضاف “زوجتى قطعت كل وسائل التواصل بينا بعد الحبس واللي كان بيحضر الجلسات والدي، والنهاردة أنا بقول اللي هي عملته كان الصح وهي حمت آدم مني، وأنا فكرت في الانتحار، وأقدمت عليه، وحاولت أقطع شرايين إيدى وده حرام، وكنت يائس جداً وقت الطلاق، حتى الدكتور قال لي أنت مفتري قاطع إيديك الاتنين”.
واختتم عزمي حديثه قائلاً “اضطريت أعمل أفلام مقاولات علشان أقدر أصرف على بيتي، ومن الأعمال اللي بحبها: “عباس الأبيض”، و”يتربى في عزو” مع يحيى الفخراني”.
